देश बर्वाद हुन लाग्यो, हामीले कहाँ मिसन ८४ को चुनाव भनेर पर्खेर हुन्छ: अध्यक्ष ओली

काठमाडौँ । नेकपा एमालेका अध्यक्ष केपी शर्मा ओलीले वर्तमान सत्ता गठबन्धनको गोत्र निकम्मा र जात देशद्रोही भएको आरोप लगाएका छन् ।  बिहीबार पार्टी कार्यालय च्यासलमा एमाले निकट खेलकुद महासङ्घको बैठकलाई सम्बोधन गर्दै पूर्व प्रधानमन्त्री समेत रहेका अध्यक्ष ओलीले गठबन्धनमा रहेका दल र नेताहरूको घाटी मात्रै नभएर सिङ्गै शरीर पनि जोडिएको बताए ।

‘यी एकै नस्लका हुन् । कमिसन तन्त्रका हुन् । यिनको गोत्र निकम्मा र जात देशद्रोही हो’, अध्यक्ष ओलीले भने, ‘त्यसकारण यी एकै ठाउँमा बस्छन् । त्यसकारण हामीले जनताका बलमा आन्दोलनमा उत्रनुपर्ने   र देश बरबाद हुनबाट जोगाउनुपर्ने पनि हुनसक्छ ।’

उनले अहिले गठबन्धनका टाउकोमा सुगा पनि बस्ने र काग पनि बस्ने भन्दै सबैले गठबन्धनलाई चिनिसकेको बताए ।  ‘सरकार निकम्मा । भ्रष्टाचार र कमिसनखोरी सरकारको संरक्षक । यस स्थितिमा हामीले मिसन ८४ पर्खन नसक्ने अवस्था पनि आउन सक्छ’, अध्यक्ष ओलीले भने, ‘देश बर्वाद हुन लाग्यो भने हामीले कहाँ मिसन ८४ को चुनाव भनेर पर्खेर हुन्छ ?

उनले लोभीपापीहरुको गठबन्धन सहजै नभत्कने भएकाले देश जोगाउन पार्टीले सिठ्ठी बजाउनेवित्तिकै कार्यकर्ताहरु आन्दोलनका लागि तयार रहनुपर्ने बताए । ‘यो गठबन्धन देशका लागि अत्यन्तै हानिकारक छ, राष्ट्रियतालाई कमजोर बनाइसक्यो, देशका स्रोतहरू बेचिसक्यो । हाम्रो स्वाधीनता र स्वाभिमानलाई धुजा धुजा बनाइसक्यो । त्यसकारण समय घर्किनुभन्दा अघि हामी तयार रहनुपर्छ’, ओलीको भनाइ छ ।

सम्बन्धित समाचार

तपाईंको इमेल ठेगाना प्रकाशित गरिने छैन। आवश्यक क्षेत्रहरूमा * चिन्ह लगाइएका छन्