काठमाडौं । नेपाल प्रिमियर लिग (एनपीएल) को तेस्रो संस्करण सुरु हुनुअघि एक्स्ट्रीम इनर्जी ड्रिङ्कले ‘एक्स्ट्रीम एन्थम’ सार्वजनिक गरेको छ । क्रिकेटको रोमाञ्च र समर्थकको उत्साहलाई संगीतमार्फत प्रस्तुत गर्ने उद्देश्यले तयार गरिएको एन्थमले प्रतियोगिताको माहोललाई थप ऊर्जावान् बनाउने अपेक्षा गरिएको छ ।
क्रिकेट मैदानमा खेलाडीले देखाउने प्रतिस्पर्धात्मक जोश, चौका–छक्कामा समर्थकले व्यक्त गर्ने खुसी र टोलीको जितप्रतिको उत्साहलाई समेटेर एन्थम तयार गरिएको कम्पनीले जनाएको छ । विशेषगरी युवा पुस्ताको सांगीतिक रुचि र क्रिकेटप्रतिको बढ्दो आकर्षणलाई ध्यानमा राखेर यो प्रस्तुति ल्याइएको हो ।
एनपीएल सिजन ३ मा एक्स्ट्रीम इनर्जी ड्रिङ्कले काठमाडौं गोर्खाज, लुम्बिनी लायन्स, विराटनगर किङ्स, जनकपुर बोल्ट्स, चितवन राइनोज र कर्णाली याक्ससँग मुख्य प्रायोजकका रूपमा साझेदारी गरेको छ । पोखरा एभेन्जर्ससँग भने जर्सीको छातीमा लोगो रहने गरी प्रायोजन साझेदारी गरिएको कम्पनीले जनाएको छ ।
‘एक्स्ट्रीम एन्थम’ मा युनिक पोयट नामले परिचित उत्साह जोशीको स्वर तथा शब्द रहेको छ । ब्लुस (सुरज शाही) ले संगीत सिर्जना तथा संयोजन गरेको एन्थमको निर्माण एनएफटीपी टिमले गरेको हो ।
कम्पनीका अनुसार यो एन्थम गीतमा मात्र सीमित नभई क्रिकेट र संगीतलाई एउटै उत्सवमा जोड्ने सिर्जनात्मक प्रयास हो । खेलाडीको जित्ने अठोट र समर्थकको टोलीप्रतिको विश्वासलाई संगीतमार्फत प्रस्तुत गर्दै क्रिकेटप्रेमीसँग भावनात्मक सम्बन्ध थप बलियो बनाउने उद्देश्य राखिएको छ ।
‘एक्स्ट्रीम एन्थम’ एक्स्ट्रीम इनर्जी ड्रिङ्कको आधिकारिक युट्युब तथा टिकटकमार्फत हेर्न र सुन्न सकिनेछ ।
