काठमाडौं । एनएमबि बैंकले आफ्ना ग्राहकलाई डिजिटल बैंकिङ सेवा अझ सहज र छिटो उपलब्ध गराउने उद्देश्यले नेपाल सरकारको सूचना प्रविधि विभाग (DOIT) सँग सहकार्य गरेको छ ।
यो सहकार्यसँगै अब एनएमबि बैंकका ग्राहकले नागरिक एपमार्फत अनलाइन बैंकिङ सेवाका लागि आवश्यक फाराम सजिलै भर्न सक्नेछन् । यसले व्यक्तिगत विवरण पटक–पटक टाइप गर्नुपर्ने झन्झट हट्नुका साथै कागजी प्रक्रिया पनि कम हुने बैंकले जनाएको छ ।
बैंकका अनुसार नयाँ व्यवस्थाले अनलाइन आवेदन प्रक्रिया छिटो, सरल र प्रयोगकर्ता–मैत्री बन्नेछ । साथै, सेवा लिन लाग्ने समय पनि घट्ने अपेक्षा गरिएको छ । ग्राहकको व्यक्तिगत जानकारीको सुरक्षालाई प्राथमिकता दिँदै बैंकले ग्राहकको स्पष्ट सहमतिबिना नागरिक एपमा रहेको कुनै पनि विवरण हेर्न वा प्रयोग नगर्ने जनाएको छ ।
ग्राहकले अनुमति दिएपछि मात्रै आवश्यक जानकारी सम्बन्धित सेवाका लागि प्रयोग गरिने व्यवस्था गरिएको छ । एनएमबि बैंकले यो सहकार्यलाई नेपालमा विकास हुँदै गएको डिजिटल पब्लिक इन्फ्रास्ट्रक्चर (DPI) को प्रभावकारी उपयोगका रूपमा लिएको छ ।
बैंकका अनुसार यसले देशभरका सेवाग्राहीलाई थप सुरक्षित, छरितो र झन्झटरहित डिजिटल बैंकिङ अनुभव प्रदान गर्न सहयोग पुग्नेछ ।
