काठमाडौं । दक्षिण कोरियाली अटो निर्माता कम्पनी हुन्डाईले आफ्नो पहिलो इलेक्ट्रीक एमपीभी ‘नेइरा’को प्रोटोटाइप सार्वजनिक गरेको छ ।
कम्पनीले इन्डोनेसियामा जारी ‘गाइकिन्डो इन्डोनेसिया इन्टरनेसनल अटो शो २०२६ मा नेइराको पहिलो झलक देखाएको हो।
नेइरा इलेक्ट्रीक एमपीभी किया केरेन्स क्लाभिस केरेन्सको प्लेटफर्ममा आधारित रहेको छ । हुन्डाईले सन् २०२६ को अन्त्यसम्ममा यसको प्रोडक्सन भर्सन बजारमा ल्याउने तयारी गरेको छ । यस गाडीमा प्रयोग हुने ब्याट्री लगायत ६० प्रतिशतभन्दा बढी पार्टपूर्जा स्थानीय स्तर (इन्डोनेसिया)मै उत्पादन गरिने कम्पनीले जनाएको छ ।
नेइराको प्रोटोटाइप उत्पादनका लागि लगभग तयार भइसकेको जस्तै देखिन्छ। यसको अगाडि हुन्डाईको सिग्नेचर पूर्ण चौडाइको एलईडी लाइट बार, पातला डीआरएल बत्तीहरू, ठाडो रूपमा राखिएका हेडल्याम्प युनिटहरू छन् । परम्परागत भ्यान शैलीभन्दा फरक यसमा बन्द गरिएको माथिल्लो ग्रिल, सिल्भर फिनिसिङ भएको बम्पर र स्क्वायर ह्वील आर्च दिएर एसयूभी प्रेरित लुक्स दिइएको छ ।
यसैगरी, गाडीको साइडमा ठूला सिसा र लामो छत प्रयोग गरी भित्री भागलाई फराकिलो बनाइएको छ। यसमा एरोडायनामिक फाइभ स्पोक एलोय ह्वील र विशेष रूपमा इलेक्ट्रीक गाडीका लागि बनाइएको ह्यानकुक आयोन एभो टायर प्रयोग गरिएको छ।
हुन्डाईले नेइरा ईभीको आधिकारिक प्राविधिक विवरण सार्वजनिक गरेको छैन । तर, यो भारतमा बिक्री भइरहेको किया केरेन्स क्लाभिससँग मिल्दोजुल्दो हुने अनुमान गरिएको छ।
केरेन्स क्लाभिस ईभीमा ४२ किलोवाट आवर र ५१.४ किलोवाट आवर को ब्याट्री प्याक उपलब्ध छ । जसले एकपटकको फुलचार्जमा क्रमशः ४०४ किमी र ४९० किमीसम्मको रेन्ज दिन्छ।
यसको मोटरले १७१ हर्षसम्मको पावर र २५५ न्युटन मिटर टर्क उत्पन्न गर्छ। १०० किलोवाटको डीसी फास्ट चार्जरबाट यो गाडी १० बाट ८० प्रतिशतसम्म ३९ मिनेटमै चार्ज हुन्छ।
हुन्डाई नेइराको लम्बाइ ४,५५० एमएम र चौडाइ १,८०० एमएम हुने अपेक्षा गरिएको छ । यसमा अत्याधुनिक सुरक्षा प्याकेज र आधुनिक सेन्सरहरू समेत समावेश गरिनेछ।
