काठमाडौं । नेपाल राष्ट्र बैंकले सरकारले सञ्चालन गर्न लागेको ‘करदाता प्रोत्साहन उपहार कार्यक्रम, २०८१’ लाई व्यवस्थित र प्रभावकारी बनाउन भुक्तानी सेवा प्रदायक संस्थाहरूलाई निर्देशन दिएको छ ।
राष्ट्र बैंक भुक्तानी प्रणाली विभागले भुक्तानी सम्बन्धी कार्य गर्न अनुमति प्राप्त सबै संस्थाहरूलाई पत्राचार गर्दै आन्तरिक राजस्व विभाग सञ्चालन गर्ने कार्यक्रमका लागि विद्युतीय प्रणालीमा अन्तर–आबद्धता कायम गर्न र कार्यक्रमका बारेमा ग्राहकहरूलाई समयमै सूचित गर्न निर्देशन दिएको हो ।
सबै भुक्तानी सेवा प्रदायकहरूले आफ्नो मोबाइल एपमा उपहार कार्यक्रमसँग सम्बन्धित बारम्बार सोधिने प्रश्नहरूको एउटा छुट्टै खण्ड समावेश गर्नुपर्नेछ ।
आगामी साउन २१ गतेदेखि सुरु हुने उक्त कार्यक्रमका बारेमा पूर्वजानकारी दिन साउन १६ गते नै सबै ग्राहकहरूलाई मोबाइल एपमार्फत नोटिफिकेसन पठाउनु पर्ने निर्देशनमा उल्लेख छ ।
कार्यक्रममा सहभागी हुनका लागि ग्राहकले आफ्नो मोबाइल एप अपडेट गर्नुपर्ने भएमा त्यसको जानकारी समेत नोटिफिकेसनमार्फत नै दिनुपर्नेछ।
