काठमाडौं । नेपाल टेलिकमकाे आर्थिक वर्ष २०८२/८३ को चौथो त्रैमासिकसम्ममा खुद मुनाफा ४७.५८ प्रतिशतले वृद्धि भएकाे छ। कम्पनीले सार्वजनिक गरेको अपरिष्कृत वित्तीय विवरणअनुसार समीक्षा अवधिमा खुद मुनाफा रु ८ अर्ब ८६ करोड ४६ लाख पुगेको हो ।
गत आर्थिक वर्षको सोही अवधिमा कम्पनीको खुद मुनाफा रु ६ अर्ब ७० करोड ६७ लाख रहेको थियो । एक वर्षको अवधिमा कम्पनीको खुद मुनाफा रु २ अर्ब ८५ करोड ७९ लाखले बढेको हो ।
त्यस्तै, कम्पनीको कुल सञ्चालन आय पनि बढेको छ । आर्थिक वर्ष २०८२/८३ को चौथो त्रैमासिकसम्म कुल सञ्चालन आय रु ३४ अर्ब ९५ करोड ४ लाख पुगेको छ । यो गत आर्थिक वर्षको सोही अवधिको रु ३३ अर्ब ८९ करोड ४५ लाखको तुलनामा रु १ अर्ब ५ करोड ५९ लाख अर्थात् ३.१२ प्रतिशत बढी हो ।
कम्पनीको कुल आय रु ३९ अर्ब १९ करोड ९६ लाख पुगेको छ । गत आर्थिक वर्षको सोही अवधिमा कुल आय रु ३८ अर्ब १८ करोड ८१ लाख रहेको थियो । यस आधारमा कुल आय रु १ अर्ब १ करोड १५ लाख अर्थात् २.६५ प्रतिशतले बढेको हो ।
करअघिको नाफा ३४.६६ प्रतिशतले बढ्यो
नेपाल टेलिकमको करअघिको मुनाफामा पनि उल्लेख्य वृद्धि भएको छ । समीक्षा अवधिमा करअघिको मुनाफा रु १३ अर्ब २६ करोड ४७ लाख पुगेको छ ।
गत आर्थिक वर्षको सोही अवधिमा यस्तो मुनाफा रु ९ अर्ब ८५ करोड २ लाख रहेको थियो । यस वर्ष करअघिको मुनाफा रु ३ अर्ब ४१ करोड ४५ लाख अर्थात् ३४.६६ प्रतिशतले बढेको कम्पनीले जनाएको छ ।
कम्पनीको EBITDA रु २० अर्ब ४८ करोड १ लाख पुगेको छ । गत आर्थिक वर्षको सोही अवधिमा यो रु १८ अर्ब ४९ करोड ६० लाख रहेको थियो । EBITDA रु १ अर्ब ९८ करोड ४१ लाख अर्थात् १०.७३ प्रतिशतले वृद्धि भएको हो ।
कम्पनीको वार्षिकीकृत प्रति शेयर आम्दानी (EPS) रु ४९.२५ रहेको छ ।
ब्याज आम्दानी घट्दा पनि राजस्व वृद्धि
कम्पनीका अनुसार ब्याजदर क्रमिक रूपमा घटेका कारण ब्याज आम्दानीमा कमी आएको छ । गत आर्थिक वर्षको चौथो त्रैमासिकको तुलनामा समीक्षा अवधिमा ब्याज आम्दानी करिब रु ८६ करोड १९ लाख अर्थात् २२.८८ प्रतिशतले घटेको छ ।
यद्यपि, GSM सेवातर्फको राजस्व बढ्दा कम्पनीको समग्र सञ्चालन आय वृद्धि भएको हो । GSM तर्फको राजस्व गत आर्थिक वर्षको सोही अवधिको तुलनामा रु ६४ करोड ५४ लाख अर्थात् २.२८ प्रतिशतले बढेको कम्पनीले जनाएको छ ।
नेपाल टेलिकमले राष्ट्रको सञ्चार सेवाका रूपमा विकट तथा दुर्गम स्थानमा समेत सेवा विस्तार र गुणस्तर सुधारलाई निरन्तरता दिइरहेको जनाएको छ । यस्ता क्षेत्रमा लागत बढी र प्रतिफल कम भए पनि नागरिकलाई सञ्चार सेवा उपलब्ध गराउने उद्देश्यले कम्पनीले सेवा विस्तार गरिरहेको बताएको छ।
